Wie is ons?

Ons storie

Datonet is 'n plaaslike internetdiensverskaffer wat internet-, VoIP- en IT-dienste aan huise en besighede in Pretoria-Oos en omliggende gebiede lewer.

Die maatskappy is in 2017 gestig deur Daniel en Tobie, twee vriende wat mekaar reeds van skooldae af ken. Hulle passie vir tegnologie en draadlose netwerke het begin lank voor Datonet, toe hulle saam betrokke was by netwerke soos Plotnet/Wipronet.

Met geen bestaande kliëntebasis en beperkte kapitaal het hulle Datonet van die grond af opgebou. Die doel was eenvoudig: om betroubare internetdienste te lewer en kliënte te behandel soos hulle self behandel sou wou word.

Daniel woon al sy hele lewe in Bashewa en het nog altyd geglo dat inwoners van Pretoria-Oos toegang behoort te hê tot betroubare internet en vinnige, persoonlike ondersteuning. Tobie, wat in Kleinfontein woon, deel dieselfde visie en glo sterk daarin om plaaslike mense aan te stel en geleenthede binne die gemeenskap te skep.

Wat as 'n klein onderneming begin het, het oor die jare gegroei tot 'n gevestigde diensverskaffer met 'n toegewyde span van veldtegnici, tegniese ondersteuningspersoneel en administratiewe personeel. Daniel en Tobie bly steeds daagliks aktief betrokke by die netwerk, ondersteuning en bestuur van die besigheid.

Vandag bly ons fokus dieselfde as op dag een: betroubare dienste, vinnige ondersteuning en persoonlike kliëntediens. Ons glo dat tegnologie mense moet verbind, en daarom streef ons daarna om langtermynverhoudings met ons kliënte te bou deur eerlike diens, professionele ondersteuning en 'n opregte betrokkenheid by die gemeenskap wat ons bedien.

Trots Plaaslik

Datonet is meer as net 'n internetdiensverskaffer — ons is deel van die gemeenskap wat ons bedien.

• Ons skep plaaslike werksgeleenthede deur mense uit ons gemeenskappe aan te stel.
• Die eienaars, Daniel en Tobie, woon self in Pretoria-Oos en verstaan die behoeftes van die area.
• Ons ondersteun plaaslike veiligheidsinisiatiewe, insluitend gratis internetverbinding vir kamera-netwerk van sekuriteitsmaatskappye wat help om ons gemeenskappe veiliger te hou.
• Ons verskaf gratis internetdienste aan verskeie skole en maatskaplike-diensverskaffers as deel van ons verbintenis tot gemeenskapsontwikkeling.

Wanneer jy Datonet ondersteun, ondersteun jy ook die plaaslike gemeenskap.

Netwerk & Tegniese Infrastruktuur

Datonet se netwerk is gebou met stabiliteit, betroubaarheid en goeie werkverrigting as kernfokus. Ons weet internet werk net so goed soos die netwerk agter dit, daarom het ons oor tyd ’n sterk en goed verspreide infrastruktuur opgebou.

Ons het tans drie onafhanklike Layer 2 skakels na Johannesburg wat by die Teraco-datasentrum eindig. Hierdie skakels loop oor drie verskillende verskaffers — DFA, MetroFibre en Openserve — sodat ons nie van net een verskaffer afhanklik is nie. Dit help om onderbrekings te verminder en hou die diens meer stabiel.

Die netwerk ondersteun ook IPv6, wat ons gereed maak vir toekomstige tegnologie en groei.

In totaal het ons kernnetwerk ’n kapasiteit van 4 Gbps, met gewone spitstye wat tot ongeveer 2.5 Gbps gebruik bereik. Dit beteken ons netwerk kan steeds goed presteer wanneer baie mense gelyk aanlyn is.

Vir vinniger plaaslike verkeer is ons direk gekoppel aan beide NAP Africa en JINX internet-uitruilpunte (IXPs). Dit help dat plaaslike verkeer vinniger en meer direk vloei.

Internasionale verkeer word deur drie verskillende IP Transit verskaffers hanteer. Dit gee ons ekstra opsies en help om internasionale verbindings meer betroubaar te hou.